O,AMANG SI NUAN TUNAS KU

Kobun apea,magodang ko tibu so mangguris au,

Pala di i ingot le baya di nasuada olo madabu tubagasan do aek ni mata.

Rarat ni pangaroai  do namarlobi,satontang nasib na di tarimo ni badan . Tapi jungada pe songoni olo les marsobar do ibana. Apea di suankon painte mangodang,so les adong opkopon ni daranak di pudi niari.

O, amang si nuan tunas ku,ringgasmaho nasikolai, so dapot dio bisuk napeto.ulang sugari songon ayahmu namagodang di dangol ni angoluan. Ho maia le baya sandaranku saulokon,napato togu di nalandit, na mangalaungi di las niari,,na manorangi di nagolapan.

Painte  apea magodang,hutangkok do dolok naincat,hu langkaon do pat on tu lombang ni olbung,soni udan na por dohot ari namilas hu tompu do sude,asalma dapot sarupia panyambung ni angoluan dohot  panyikolaon mu.

O,amang si bayo angin,ingot ko tu ugamo,soni pe tu pituah ni ompunta nadung jumolo sundut i. harana i do nai ita baen tungkot di namardalan sulu di borngin ni ari, so ulang nian  mogap di narami.

Molo itatap gunung pasoman,

jonjong togok songon dinding

sondia pe sibuk na di pandaraman,

ulang le lupa di nasumbayang,

Ho ale amang na di pandaraman,

na manjalaki bisuk na peto,

Ulang baya lupa di parkouman,

so les torang sampe tu jolo,

Songgop  baya amporik,

Na songgop di durame,

Sai majolo na utona on sotik,

So i pasonggop di ate ate,

                                                                                                 

                                                                                                        Padang Tujuh, 01 Maret 2014